Konstrukshon di bario nobo “LIBERTAD”
E momentu a yega pa kuminsá ku e konstrukshon di un bario nobo i moderno “LIBERTAD” riba, tera di famia, Plantashon Malpais (a) Gato.
For di dia 1 di sèptèmber 2018, tur esnan ku ta interesá pa konstruí un kas den e bario nobo“LIBERTAD” tin e oportunidat pa yama 6818079 i traha un sita pa bini na remarke pa un kòntrakt.
Riba seru di Gato, kual ta e parti di Plantashon Malpais ku ta keda entre Seri Kandela i Papaya, fundashon “Stichting Belangenbehartiging Rechtsopvolgers van Sybrecht van Uytrecht”, tin un akuerdo ku B.O.B. Architects N.V., pa ehekutá Proyekto “LIBERTAD”. Riba seru di Gato un bario nobo i moderno ta bai wòrdu konstruí kompletamente ku tur fasilidat nesesario.
Tur hende ku tin nesesidat i ku ta deseá traha un kas, por bini na remarke pa hür un tereno i seguidamente konstruí un kas den e bario nobo “LIBERTAD”.
Loke ku ta nesesario ta bon komprenshon, koperashon i komportashon entre e fundashon i esnan ku skohe boluntariamente pa biba den e bario “LIBERTAD”, i asina un meta importante di fundashon “Stichting Belangenbehartiging Rechtsopvolgers van Sybrecht van Uytrecht”, pa uni i halsa nivel di bida, ta wòrdu realisá.
Konekshon di awa i koriente
En relashon pa konektá Plantashon Malpais (a) Gato riba ret di awa i koriente di OGEM, Bestuurscollege di Kòrsou, na aña 1973 a rekomendá defuntu Gerardus Lazaro Ferero, pa traha un plan di parselashon i laga Bestuurscollege aprobá esei. Na e momentu e, señor Gerardus Lazaro Ferero, siendo un ansiano di 87 aña, nò tabatin e moda finansiero pa kumpli ku rekomendashon di Bestuurscollege.
Aunke señor Gerardus Lazaro Ferero, nò tabatin forsa finasiero pa traha un plan di parselashon, tòg riba 26 yüli 1983, señor Gerardus Lazaro Ferero ofishalmente a firma un akuerdo ku KODELA, pa konektá Plantashon Malpais (a) Gato riba ret di awa i koriente.
Señor Gerardus Lazaro Ferero a duna tur su koperashon pa plantashon Malpais (a) Gato por a wòrdu konektá riba e ret di awa i koriente.
Gerardus Lazaro Ferero, tabata un heredero legitimo di desendientenan di katibunan liberá di señora Sybrecht van Uytrecht, viuda di domi Wigboldus van Rasveldt.
Gerardus Lazaro Ferero tabata un di e desendientenan di katibu liberá i heredero, “LEENTJE”, i Gerardus Lazaro Ferero tabata enkargá ku e plantashon personalmente komo heredero i tambe na nòmber di tur e sobra herederonan. Ademas Gerardus Lazaro Ferero tabata e atministrador legítimo di Plantashon Malpais (a) Gato. Gerardus Lazaro Ferero tabatin un akta original den su poder, di 21 febrüari 1812, esei ta e dia ku e tèstamènt di Sybrecht van Uytrecht a wòrdu ehekutá.
Na aña 1981 hurista O. A. Seferina, hefe inspektor di Belasting, a deklará ku señor Gerardus Lazaro Ferero pa mas ku 40 aña tabata enkargá ku pago di belasting pa plantashon Malpais.
Konstrukshon di bario nobo “LIBERTAD”
Herederonan Ferero, ku ta herederonan di defuntu Gerardus Lazaro Ferero, na aña 2001 a traha un plan di akshon pa desaroyá plantashon Malpais (a) Gato. E plan pa desaroyá Malpais a wòrdu entregá na aña 2004 na Bestuurscollege.
E plan pa desaroyá plantashon Malpais ta kontené fase 1, pa desaroyá Gato abou sigun e situashon aktual i fase 2 ku ta trata di konstrukshon di e bario nobo riba Seru di Gato.
Fundashon, Stichting Belangenbeharteging Rechtsopvolgers van Sybrecht van Uytrecht, ta bai sigui ku fase 2 di e desaroyo di Plantashon Malpais, konstruyendo un bario nobo “LIBERTAD”.
E bario nobo “LIBERTAD” tin espasio pa konstrukshon di 600 vivienda, un skol, sentro di médiko, sentro komersial, sentro pa deporte, sentro di bario, iglesia i parke pa rekreo.
E meta di fundashon Stichting Belangenbehartiging Rechtsopvolgers van Sybrecht van Uytrecht, ta pa krea un bario nobo “LIBERTAD” ku tin tur e fasilidatnan nesesario kaminda tur esnan ku ta biba den e bario “LIBERTAD” tin komprenshon i ta koperá ku otro pa logra ku e bario ta bira un lugá ideal pa biba.
Fundashon Stichting Belangenbehartiging Rechtsopvolgers van Sybrecht van Uytrecht ta hasi su máksimo esfuerso pa desaroyá Plantashon Malpais (a) Gato mas pronto posibel, kompletamente legal i ku tur e pèrmit nesesario nan.
Fundashon Stichting Belangenbehartiging Rechtsopvolgers van Sybrecht van Uytrecht, na nòmber di tur e herederonan di katibunan liberá Rasveldt ta pone100 hèktar disponibel, riba Plantashon Malpais. Persona nan ku tin nesesidat di un kas, por bini na remarke pa hür un tereno i traha un kas den e bario nobo“LIBERTAD”.
For di dia 1 di sèptèmber 2018, tur esnan ku ta interesá pa konstruí un kas den e bario nobo “LIBERTAD” tin e oportunidat pa yama 6818079 i traha un sita pa bini na remarke pa un kòntrakt.
Plan di parselashon di proyekto “LIBERTAD”
Comments
Post a Comment