Movementu Kousa Promé a yega na e konklushon ku e gobièrnu di PAR, MAN ku PIN mester bai anto lihé.

Gobièrnu Rhuggenaath

mester bai anto lihé!

Movementu Kousa Promé a yega na e konklushon ku e gobièrnu di PAR, MAN ku PIN mester bai anto lihé. E gobièrnu aki no tin niun balor agregá pa pueblo di Kòrsou, pasobra:

-        Nan huntu ku nan sosten di 12 parlamentario a resultá di ta un ekipo di bèrgwensa pa e yu-di-Kòrsou;

-        

     Den 22 luna nan a krese e debe nashonal i hiba Kòrsou na bankarota;

-        Nan a demostrá di ta un gobièrnu sin wesu di lomba ku a pone nan mes shen por shento na disposishon di Hulanda [groeistrategie];

-        Nan ta goberná pa e kolonisadó Hulanda i no pa Kòrsou ni pa e yu-di-Kòrsou, siendo ku nan sa bon bon kiko a pasa ku e “pas de deux” di Miguel Pourier i e “kogel door de kerk” di Don Martina;

-        Nan a keda drei rònt pa finalmente aseptá SOFA, entregando Kòrsou komo trampolin pa Hulanda i Merka agredí Venezuela militarmente for di teritorio di Kòrsou aseptando ku:

o      Sòldánan merikano por drenta Kòrsou aktua i move grátis sin niun opstákulo;

o      Sòldánan merikano tin akseso inlimitá den nos sistemanan di komunikashon;

o      Sòldánan merikano no mester paga pa uza haf di Kòrsou;

o      Outoridatnan di Kòrsou no tin poder pa subi i inspekshoná tripulashon ni ekipo den avion i barkunan militar merikano;

Meskos ku Kousa Promé ta kuestioná SOFA aki na Kòrsou, parlamentarionan krítiko hulandes a hasi preguntanan kayente, insistente i direkto riba e 4 puntonan kuestionabel aki tokante SOFA;

-        Un gran parti di pueblo no ta niun tiki satisfecho ku e aktual gobièrnu Rhuggenaath;

-        Nan a traishoná e region di Karibe komo zona di pas i pais Kòrsou su posishon komo pais i pueblo di pas, kolaborando ku Donald Trump, e presidente diabóliko di Merka, minister presidente Marc Rutte di e partido mas korupto di Hulanda [VVD koploper in affaires in VN’s Politieke Integriteits-Index] i e terorista golpista venezolano Juan Guaidó;

-        Komo gobièrnu i parlamento nan no a inspirá pueblo niun tiki pa ta orguyoso di nan i di tin konfiansa den nan;

-        Nan a demostrá di ta un gobièrnu basá riba mentira i engaño: por ehèmpel premier Rhuggenaath ta bisa pueblo ku el a firma simplemente pa Kòrsou duna ayudo humanitario na Venezuela, siendo ku den realidat el a firma tambe pa outorisá sòldánan merikano pa por drenta teritorio kurasoleño i ataká Venezuela ora Donald Trump disidí esaki. E diplomátiko rusiano Maria Zakharova a atvertí Kòrsou pa esaki;

-        Nan a kuminsá ku benta di propiedatnan patrimonial di Kòrsou manera UTS tresiendo e protekshon i siguridat di datonan konfidensial di gobièrnu i di pueblo en general na peliger;

-        Nan no ta patriota i ta goberná pa kresementu ekonómiko di Hulanda [groeistrategie] i no kresementu di Kòrsou;

-        Nan ta yenando Kòrsou ku makamba na posishonnan importante kalifikando akadémikonan i téknikonan yu di tera komo inkapas;

-        Poniendo ekspertonan makamba na posishonnan haltu i stratégiko gobièrnu Rhuggenaath ta yuda Hulanda haña kòntròl total di tur loke ta pasa na Kòrsou;

-        Nan a demostrá ku nan no por goberná. Nan a krea un krísis i atrobe ta rumbo pa Hulanda pa tuma instrukshon i yudansa [ art. 25 lei di reino pa supervishon finansiero];

-        Bou di nan gobernashon algun mil yu-di-Kòrsou a pèrdè trabou, hopi empresa a será nan porta i algun shen ámtenar ta bai haña retiru masal;

-        Nan a demostrá bon kla ku nan tin un plan den ehekushon pa será Refineria Isla. Ya kaba ta opvio ku nan ta e kulpabelnan pa pèrdida masal di trabou bou di trahadónan i kontratistanan di Refineria Isla;

-        Bou di instrukshon di Koninklijke Shell i gobièrnu hulandes nan a kore na un manera brutal ku Guandong Zenrong.

-        Bou di nan gobernashon un banko komersial i no PSB a bira e banko ofisial di gobièrnu;

-        Nan ta un gobièrnu di korupshon ku ta ekselá den tapamentu di korupshon: Hospital nobo – UTS – Vèlt di Barber – La Fogata – Baoase – Playa Marriot –

5.6 mion pa Opleiding polis – FKP – SOAW den Tauber Building – 1125 kilo di droga – RDK – CRU - Refineria Isla –33 mion di Insel Air – GIRO Bank NV – Subida di prima di seguro ku 13.5 porshento i hopi mas;

-  Ku nan posishon insistente kontra e gobièrnu demokrátiko eligí di Nicolaas Maduro i pro e gòlpista Juan Guaidó nan ta kulpabel i responsabel pa seramentu di frontera;

-        Nunka ainda a eksistí un mal kontentu asina grandi bou di e pueblo di Kòrsou kontra un gobièrnu di turno;

-        E aktonan anti-patriótiko i kontra interes di Kòrsou a pone ku pueblo di Kòrsou no tin niun motibu bálido mas pa kere den gobièrnu Rhuggenaath;

-        Nan a falta rèspèt pa e pueblo bondadoso, hospitalario i pasífiko di Kòrsou ora nan a keda insistí huntu ku Hulanda pa finalmente entregá Kòrsou komo hùp militar na merikanonan kende nan tabata e promé i úniko gobièrnu na mundu ku a tira bòm atómiko matando míles i míles di mucha, ansiano, hende desabilitá, hòmber i muhé inosente;

-        Nan a demostrá ku nan ta dispuesto na entregá e krenchi di outonomia ku Kòrsou a keda kuné na kapital hulandes;

-        Nan no ta meresé di karga e prestigio di ta e gobièrnu di pueblo di Kòrsou;

-        Movementu Kousa Promé ta deklará ku pa tur e motibunan deskribí:

o      E no tin konfiansa den gobièrnu PAR, MAN, PIN

o      Gabinete Rhuggenaath no ta digno pa representá e prestigioso pueblo di Kòrsou;

-        A yega e momento pa Kòrsou haña un gobièrnu sobèrbè konsistiendo di patriota ku por trese konfiansa i orguyo bèk den nos pueblo i ku por yuda nos komo pueblo orguyoso di Kòrsou rekobrá rèspèt den e mundu internashonal.

Lider Polítiko di Kousa Promé

mr. dr. René Rosalia